Президент компанияларды басқаратын әйелдер үлесін арттыру туралы айтты

Қасым-Жомарт Тоқаев Ұлттық қоғамдық сенім кеңесі отырысында компанияларды басқаратын әйелдер үлесін арттыру керек екенін айтты.

Биыл мамыр айында мемлекет басшысы Сайлау туралы заңға өзгеріс енгізді. Соған сәйкес, партиялардың сайлауалды тізіміне әйелдер мен жастар үшін 30%-тік квота енгізу қажеттігі заң тұрғысынан рәсімделді.

Біз әйелдерге қолдау көрсетіп, олардың мемлекетті басқару ісіне барынша белсенді атсалысуын жүйелі түрде іске асырып келеміз. Статистика сәйкес, барлық мемлекеттік әкімшілік қызметшінің 55%-тен астамы әйелдер, сонымен бірге Парламент пен мәслихат дептутаттарының 22%-і, судьялар корпусының 47%-і әйелдер еншісінде. Бұған қоса, биыл еліміздің тарихында тұңғыш рет әйел адам облыс басшысы болды. Сарапшылардың бағалауынша, Қазақстан – мемлекеттік басқару жүйесіндегі және билік органдарындағы әйелдер үлесі бойынша посткеңестік елдер арасында көш бастап тұрған мемлекеттердің бірі. Әйел бір қолымен бесікті тербетсе, бір қолымен елді билейді, – деді Қасым-Жомарт Тоқаев.

Алайда президент компанияларды басқаратын әйелдер үлесі (5-7%) әлі де төмен екенін айтты.

Қасым-Жомарт Тоқаевтың сөзінше, кеңес мүшелері мемлекет қатысатын компаниялардың басқару органдарында әйелдер үлесін 30%-ке дейін ұлғайту туралы міндетті норма енгізу туралы ұсыныс айтты.