Түркістан облысында екі күнде 47 жария пікірсайыс өтті

Тартысты да тартымды әрі жақсы ұйымдастырылған дебаттарға аудан, қалалардан жалпы саны 233 үміткер қатысып, өзара ой жарыстырған.

Түркістан облысында 14 және 15 қыркүйекте праймериз аясында 47 жария пікірсайыс өткізілді. Дебаттар партия филиалдарының ресми акаунттарында тікелей эфирде көрсетілуде. Облысымызда ерекше ұйымдастырылған пікірсайыстың бірі ретінде Түркістан қаласы Қожа Ахмет Ясауи кесенесінің маңындағы 1000 орындық амифитеатрда өткізілген іс-шараны айтсақ болады.

Естеріңізге сала кетейік, жария пікірсайыс 14 қыркүйекте басталып, 30 қыркүйекте аяқталады. Осы мақсатта «Nur Otan» партиясы Түркістан облыстық филалы тарапынан дауыс беруге және дебаттарды өткізуге арналған 209 орын белгілеген болатын. Оның 128-і мәдениет үйлері мен ауылдық клубтар болса, 58-і мейрамханалар мен жеке кәсіпкерлік нысандары, 23-і жеке үйлер мен спорт ғимараттары саналады.

Айта кетейік, праймериз ережесіне сәйкес Түркістан облысында 17 тамыз бен 28 тамыз аралығында кандидаттарды тіркеу жұмыстары жүрді. Бұл аралықта барлық аудан, қалаларда праймеризге 1144 кандидат тіркелген болатын.

Алдағы 1-3 қазан аралығындағы үміткерлерге дауыс беріледі. Оған «Nur Otan» партиясының Түркістан облыстық филалының 80 мыңнан астам мүшесі қатысады деп жоспарлануда. Олар 245 бастауыш партия ұйымына бекітілген.