Кездесуде Мемлекет басшысы Қасым-Жомарт Тоқаевтың «Жаңа жағдайдағы Қазақстан: іс-қимыл кезеңі» атты Қазақстан халқына Жолдауында айтылған басым міндеттер талқыланды.
Мемлекеттік хатшы Президенттің биылғы Жолдауы пандемия мен жаһандық экономикалық дағдарыс жағдайындағы Қазақстанның жаңа әлеуметтік-экономикалық даму бағыты екенін айтты. Барлық өзгеріс мемлекеттің жұмыс істеу тиімділігін арттыруға, өзекті әлеуметтік-экономикалық проблемаларды шешуге бағытталған.
Қырымбек Көшербаев қазіргідей күрделі кезеңде зиялы қауым дағдарыстың алдын алуда, халықтың жаңа бірегейлігін қалыптастыруда роль атқаруға тиіс екенін атап өтті.
«Бұл ретте жаңа кезеңнің сын-қатерлерін ескере отырып, бірінші кезекте, ұлы Абайдың баға жетпес мұрасын қайта зерделеп, зиялы қауымның ұлттың жаңа рухани қасиеттерін қалыптастырудағы миссиясын терең түсіну қажет. Тұңғыш Президент Нұрсұлтан Назарбаев ұсынған «Рухани жаңғыру» бағдарламасын іске асыруда оның мазмұнын байытып, серпін беру керек. Мысалы, халық дәстүрлері мен әдет-ғұрыптарын сақтау және қорғау мәселелерін құқықтық реттеу бойынша ғалымдар мен қоғам қайраткерлерінен тұратын жұмыс тобын құру қажет. Дағдарыс кезіндегі және болашақта ұлттың дамуының негізі ең алдымен отбасы мен отбасылық тәрбие болуы керек. Орта мектептерде отбасы құндылықтарына бағдарланған арнайы пәндерді енгізуді қарастырудың, жастарды отбасылық тәрбиелеудің жалпыұлттық әдістемесін әзірлеудің уақыты келді», — деді Қырымбек Көшербаев.
Ашық пікір алмасу жағдайында өткен кездесуде белгілі мәдениет және ғылым қайраткерлері Оразалы Сәбден, Смағұл Елубай, Мұрат Әуезов, Төрегелді Шарманов, Мұрат Жұрынов, Рахман Алшанов, Асанәлі Әшімов және басқа да азаматтар ұсыныстарын айтты.
