Қолданыстағы заңнамаға сәйкес, зейнет жасы ерлер үшін 63, әйелдер үшін 59,5 жастан басталады.
Сонымен бірге Бірыңғай жинақтаушы зейнетақы қорында жеткілікті жинақталған зейнетақы қаражаты бар Қазақстан азаматтары зейнетақы аннуитеті құқығын (зейнеткерлік жасқа жеткенге дейін зейнеткерлікке шығу) пайдалана алады. Зейнетақы аннуитеті ерлер үшін 55 жас, әйелдер үшін 51,5 жас мөлшерінде белгіленген. Зиян еңбек жағдайларында жұмыс істейтін азаматтар 50 жастан бастап зейнетақы аннуитетін пайдалана алады.
«Қазақстан Республикасында зейнетақымен қамсыздандыру туралы» заңда әйелдердің зейнет жасын 2018 жылдан 2027 жылға дейін 10 жыл ішінде 6 ай сайын арттыру көзделген.
Сонымен бірге зейнет жасының ұлғаюы қазіргі уақытта зейнетақыны ерте алуға құқығы бар әйелдерге әсер етпейді:
— 5 немесе одан да көп бала туып (асырап алып), оларды сегіз жасқа дейін тәрбиелеген әйелдер 53 жаста;
— Семей ядро сынақ полигонының төтенше және ең жоғары радиация қаупі бар аймақтарында 1949 жылғы 29 тамыздан 1963 жылғы 5 шілдеге дейін кемінде 5 жыл өмір сүрген әйелдер 45 жаста зейнетке шығады.
Ведомство азаматтарды жалған ақпаратқа назар аудармауға және ақпаратты тек ресми дерекөздерден алуға үндеді. Сонымен бірге жалған ақпарат тарату заң бойынша жазаланатынын еске салды.
