Бүгін облыс әкімі Гүлшара Әбдіқалықованың төрағалығымен кеңейтілген мәжіліс өтті. Күн тәртібінде аймақтағы короновирус індетімен күресу бағытындағы атқарылып жатқан жұмыстар, өңір экономикасының көрсеткіші мен «Жұмыспен қамту жол картасы» мемлекеттік бағдарламасында жаңа жұмыс орындарын ашу мәселесіне тоқталды.
Облыстық денсаулық сақтау басқармасы басшысының баяндамасын тыңдаған облыс әкімі Гүлшара Әбдіқалықова короновирус індетімен күресу бағытында арнайы жоспар жасап, 3 күн мерзімде бекітуге ұсынуды тапсырды.
Мемлекет басшысы Қасым-Жомарт Тоқаев Үкіметтің кеңейтілген отырысында ел экономикасының жалпы 1,8%-ке төмендегенін атады. Облыста жартыжылдықтың қорытындысымен негізгі алты көрсеткіштің 5-еуі бойынша төмендеу тенденциясы орын алған. Құрылыс жұмыстары 68,2%, инвестиция тарту 49,5% төмендеген. Сонымен қатар әлеуметтік маңызы бар азық-түлік тауарлары бағасы жыл басымен салыстырғанда республикалық көрсеткіштен жоғарылаған.
Аймақ басшысы әлеуметтік маңызы бар азық-түлік тауарлары бағасы бойынша жыл басынан бері 19 азық-түліктің 13-не баға жоғарылағанын атады.
Картоп 63, сәбіз бен пияз 50 процентке қымбаттаған. Қыс немесе көктемгі тапшылық кезең емес, нағыз көкөністердің пісіп жатқан мерзімінде не деген сұмдық? Барлық ауданда бағалардың артық өсуіне жол берілсе, соның ішінде Жаңақорғанда жеті, Арал мен Қызылордада алты түрлі азық-түліктің бағасы көтерілген,- деді облыс әкімі Гүлшара Әбдіқалықова.
Жиында бағаны тұрақтандыру бағытында жіберілген кемшіліктері үшін Жаңақорған мен Арал ауданы әкімдеріне қатаң ескерту жарияланды. Сонымен қатар аймақ басшысы Қызылорда мен аудан әкімдеріне көкөніс және басқа да әлеуметтік азық-түлік бағаларын тұрақтандыруды, негізсіз баға өсімі фактілері бойынша шаралар қабылдауды тапсырды. Сонымен қатар көршілес облыстарға шығып, халықты қолжетімді бағадағы арзан өнімдермен қамтамасыз ету үшін 3 күн уақыт берді.
Статистика бойынша облыста 89 623 гектар күріш егілген. Оның 8 492 гектар көлемі артық. Шиелі ауданы 12 200 гектар жерге күріш еккені туралы есеп бергенімен, нақты 14 353 гектарға Сыр маржаның орналастырып, 2000 гектардан астам жерге артық күріш еккен. Осыған орай қазіргі уақытта Шиелі ауданындағы 3 шаруашылықтың 720 гектардан астам егілген күрішіне су жетпей, күйіп кеткен.
Өңір басшысы берілген тапсырманы мерзімінде орындамай, күріш көлемін қолдан ұлғайтып, су тапшылығына әкеп соқтырғаны үшін Шиелі ауданының әкіміне сөгіс жариялады.
Кеңейтілген Үкімет отырысында ішкі нарықты қамтамасыз ету үшін іске қосылған «Қарапайым заттар экономикасы» бағдарламасының жүзеге асырылуы сынға алынды. Кейінгі 6 айда облыста бағдарлама аясында құны 788,6 миллион теңге болатын 37 жоба мақұлданған.
Облыс әкімі жобаның басым бөлігі Жаңақорған ауданында жүзеге асып отырғанын айтты. Кейбір ауданда әлі күнге бір жобаның жоқтығын сынға алды.
Арал ауданында бірде-бір жоба жоқ. Бұл мемлекеттік бағдарламаның орындалмағанын білдіреді. Мұхтар Әуесұлы жоғарыда аталған «қатаң ескертуді» ескере келе, сізге сөгіс жариялаймын. Келесіде көрсеткіш төмендеген жағдайда бұдан да қатаң тәртіптік жауапкершілігіңіз қаралады. Бұл барлық басқарма басшылары мен қала, аудан әкімдеріне қатысты. Сонымен қатар «Қарапайым заттар экономикасы» бағдарламасы аясында жеңілдетілген несиелендіру бойынша жұмыстар күшейтілсін. Қызылорда қаласы 10 млрд. теңге, ал барлық аудан әкімдіктері 2 млрд. теңгеге жуық межені игеру бойынша жұмыстарды жалғастыруы тиіс,- деді облыс әкімі.
Мемлекет басшысы «Жұмыспен қамту жол картасының» жүзеге асырылуы барысында да көптеген мәселе бар екенін және тұрақты жұмыс орындарын көбейтуді тапсырды. «Жұмыспен қамту жол картасы» аясында облысқа 276 жобаны жүзеге асыруға 37 миллиардқа жуық қаржы бөлінген. Бұл қыруар қаражат пандемия уақытында 9300 жаңа жұмыс орынын ашып, халықтың әлеуметтік жағдайын жақсартуға бағытталып отыр. Бүгінгі таңда 276 жобаның 270-сі бойынша жұмыс басталған. Жол картасы аясында жұмыс орнын құру көрсеткішкері — Қызылордада 39,4 және Арал ауданына 46,1%.
Өңір басшысы бардық аудан және қала әкіміне осы айдың соңына дейін ашылған жаңа жұмыс орындарын 50%-тен асыруды тапсырды.
«Еңбек» мемлекеттік бағдарламасы аясында халықты тұрақты жұмыспен қамтудың көзі — бос жұмыс орындар. Бірінші жартыжылдықта 4058 ғана адам жұмысқа орналасқан, ал жылдық жоспар 13 900 адам болса, бұл жоспардың үштен бірі де орындалмаған. Ең төмен көрсеткіштер Қазалы, Қармақшы және Сырдария аудандарында болып отыр. Сонымен қатар жаңадан ашылған жұмыс орындарының саны жылдық жоспар бойынша 12602 болса, одан 7080 ғана орын ашылған. Ең төмен көрсеткіш Қызылордада — 23%. Нұрлыбек Машбекұлы, Қызылорда әрқашан да алдыңғы қатарда болуы тиіс, жұмыс жасаңыз,- деді облыс әкімі Гүлшара Әбдіқалықова.
Президент Қасым-Жомарт Тоқаев мемлекеттік-жекеменшік серіктестік жобаларының жүзеге асырылуы барысында мемлекеттің міндеттемелеріне қатысты мәселесін жан-жақты зерттеуді тапсырған болатын. Аймақта мемлекеттік-жекешелік әріптестік аясында 57 жобаның 38-і толықтай іске қосылған. Бүгінгі таңда жобалар бойынша қабылданған мемлекеттік міндеттемелердің сомасы 16,5 миллиард теңге.
Аймақ басшысы бюджет шығысын оңтайландыру мәселесі Президенттің тікелей бақылауында болатынын ескертті. Сонымен қатар «Цифрлық Қазақстан» бағдарламасындағы барлық кемшілік түзеліп, жыл соңына дейін 250-ден астам тұрғыны бар елді мекендер сапалы интернетпен қамтылуы қажет екенін тапсырды.
Қызылорда облысында жер қатынастары бойынша геопорталды толықтыру жұмыстары 10%-ке орындалған. «Өңірлік геоақпараттық жүйені» құру цифрлық технологиялар басқармасына тапсырылған. Жұмыстарды бастауға бюджеттен тиісті қаржы да 35 миллион теңге бөлінген. Геопорталды құруға мемлекеттік сатып алу конкурсы жарияланғанымен әлі нақты тиісті жұмыстар басталмаған. Осыған байланысты цифрлық технологиялар басқармасына конкурс нәтижесімен мердігерді анықтап, жыл соңына дейін геопорталды құру жұмыстарын тапсырамын. Цифрлық даму, инновациялар және аэроғарыш өнеркәсібі министрлігімен бірлесіп жаңа оқу жылы басталар алдында 25 тамызға дейін тиісті шаралар қабылдауға тиіспіз, — деді облыс әкімі Гүлшара Әбдіқалықова.
