Ахмет Байтұрсынұлы атындағы Тіл білімі институтының өкілдерінің айтуынша, ғалым 96 жасына қараған шағында Алматыда көз жұмды.
Рәбиға Сыздық «Абай шығармаларының тілі» тақырыбында докторлық диссертация қорғаған. Ғылыми-зерттеу еңбектері қазақ әдеби тілінің тарихы, Абайдың поэтикалық тілі, қазақ тілінің поэтикасы, XV — XIX ғасырлардағы ақын-жыраулар тілі, ортағасырлық жазба ескерткіштер тілінің тарихы мен лексика-грамматикалық құрылымы, текстологиясы, тарихи лексика, лингвостилистика, тіл мәдениеті салаларына арналған. 130-дан астам ғылыми жұмыс, оның ішінде 9 монография, оқулықтар мен оқу құралдарының авторы.
Ғалым — Türk Dil Kurumu қоғамының корреспондент мүшесі, ҚР Мемлекеттік сыйлығы, Шоқан Уәлиханұлы атындағы сыйлық, І дәрежелі «Барыс» орденінің иегері. “Қазақ әдеби тілінің тарихы” монографиясы үшін Ш.Уәлиханов атындағы сыйлығын, Абайдың шығармалық мұрасын зерттеген еңбектер топтамасы үшін ҚР Мемлекеттік сыйлығын алған. «Құрмет белгісі», «Парасат» ордендерімен және бірнеше медальмен марапатталған.
