Әділ-қазылар алқасының шешімі бойынша, бірінші орынды Сәбина Қасымова алса, екінші орын Қарлығаш Нұрбековаға, үшінші орын Меруерт Күлахметоваға бұйырды.
Жеңімпазға тәжді «Ресей аруы-2013» Ксения Безуглова кигізді.
Енді Сәбина Қасымова еліміздің атынан негізін Ксения Безуглова қалаған халықаралық «Өркениет аруы» байқауына қатысады.
Байқаудың ұйымдастырылуына қоғамдық «Алматы әйелдер клубы» бірлестігі ұйытқы болды. Іріктеу осыдан екі ай бұрын басталған болатын. Ақтық жолдамаға тоғыз бойжеткен жолдама алды. Бас жүлдеге автокөлік сыйға тартылса, екінші орынға екі адамға Біріккен Араб Әмірліктеріне жолдама табысталды. Сондай-ақ, жүлделі үшінші орын иегері smart-теледидар ұтысына ие болды. Қатысушылар мүгедектер арбасында отырып өнер көрсетті, дизайнерлік және кешкі көйлектер киіп шықты.
