Finprom.kz-тің хабарлауынша, Қазақстанда 2020 жылдың алғашқы жартыжылдығында жұмыссыздық деңгейі 4,8% болды.

Елімізде жұмыссыздар саны 442,4 мыңға жетіп, өткен жылмен салыстырғанда 0,1% азайған. Осы жылдың бірінші жартыжылдығында қалада тұратын жұмыссыздар саны 266,1 мың болса, ауыл тұрғындарының 176,3 мыңы жұмыс істемейді.

Елімізде жұмыс істемейтін әйел саны — 238,4 мың, ерлер — 204 мың.

Жұмыссыздық
Инфографика: Finprom.kz

Жұмыссыз жүргендер Алматыда көп, барлығы — 51,5 мың адам. Сонымен қатар халық тығыз орналасқан Алматы облысы мен Түркістан облысында да жұмыссыздық басым. Алматы облысында 48,1 мың адам, Түркістан облысында 41,6 адам жұмыс істемейді.

Жылдың алғашқы 6 айында Нұр-Сұлтанда жұмыссыздар қатары күрт өскен. Өткен жылы мұнда 24,9 мың адам жұмыссыз болса, биыл бұл көрсеткіш 6,9% өсіп, 26,6 мың адамға жетіп отыр.

Жұмыссыздық
Инфографика: Finprom.kz

Статистика комитетінің мәліметінше, адамдар мына бес себеп бойынша жұмыссыз:

  • 110,5 мың адам өз еркімен жұмыстан кеткен;
  • 102,4 мыңының қызметке орналасуға мүмкіндігі болмаған;
  • 68,5 мың адам жеке немесе отбасы жағдайына байланысты жұмыссыз;
  • 39 мың адам үй қожалығына байланысты жұмыс істемейді;
  • 30,4 мың адам қызметкерлерді қысқарту себебімен жұмыссыз қалған.