Қазақстанда жәндік улайтын заттарды сатуға тыйым салынды

Қазақстанда жәндіктер мен кеміргіштерді улайтын қауіпті химикаттарды саудалауға тыйым салынды.

Дезинсекция, жәндік
Иллюстрация: Dribbble.com/©Vecteezy

Бұл туралы ҚР ДСМ Тауарлар мен көрсетілетін қызметтердің сапасы мен қауіпсіздігін бақылау комитетінің баспасөз қызметі хабарлады.

Қазақстанда халықтың санитариялық-эпидемиологиялық салауатын қамтамасыз ету мақсатында және дезинсекция мен дератизация қызметінде қолданылатын улағыш заттардан улану жағдайларының тіркелуіне байланысты ҚР Мемлекеттік бас санитар дәрігерінің орынбасары Нұрқан Сәдуақасов 2020 жылдың 20 ақпанында “Санитариялық-профилактикалық шаралар жүргізу туралы” қаулысын шығарды.

Осылайша бүгіннен бастап қауіп деңгейі 1, 2, 3 класқа жататын дезинсекция және дератизация құралдарын халыққа сатуға тыйым салынды, – деп хабарлады комитеттің баспасөз қызметі.

2018-2019 жылдары Ақтауда және Алматыда тұрғындар жәндіктер мен кеміргіштерді жоятын заттардан уланып, қайтыс болған еді.