Қасым-Жомарт Тоқаев Мюнхенде кімдермен кездеседі?

Қасым-Жомарт Тоқаев 14-16 ақпан аралығында Қауіпсіздік жөніндегі Мюнхен конференциясына қатысу үшін Германияға барады. Президенттің баспасөз хатшысы Берік Уәли Мемлекет басшысы бұл жұмыс сапарында кімдермен кездесетінін хабарлады. 

Қасым-Жомарт Тоқаев
Қасым-Жомарт Тоқаев. Фото: Akorda.kz

Сапар бағдарламасы бойынша Президент Мюнхен қауіпсіздік конференциясының панель пікірталасына қатысады және бірнеше мемлекеттің басшысымен, халықаралық ұйымдардың, Германияның ірі компанияларының жетекшілерімен, академиялық топ өкілдерімен екіжақты кездесулер өткізеді деп жоспарланған, – деп жазды Берік Уәли Facebook желісінде.

Оның мәліметінше, бұл жиынға барлығы 40-қа жуық мемлекеттің басшысы, сыртқы саясат пен қорғаныс бойынша 100-ден астам министр және халықаралық қатынастар саласындағы беделді сарапшылар қатысады.

Қауіпсіздік жөніндегі Мюнхен конференциясы – ірі жаһандық бейресми форумдардың бірі. Конференцияда қазіргі заманның негізгі сын-қатерлері талқыланады.