Қасым-Жомарт Тоқаев Өзбекстан Президентін 62 жасымен құттықтады

Телефон арқылы әңгімеде қос Президент Қасым-Жомарт Тоқаевтың Өзбекстанға жасаған сапары барысында қол жеткен уағдаластықтарды іске асыру барысын талқылады.

Қасым-Жомарт Тоқаев пен Шавкат Мирзиеев
Қасым-Жомарт Тоқаев пен Шавкат Мирзиеев. Фото: Аkorda.kz

Мемлекет басшысы Өзбекстан Президенті Шавкат Мирзиеевпен телефон арқылы сөйлесті.

Ақорданың баспасөз қызметінің хабарлауынша, Қазақстан Президенті Қасым-Жомарт Тоқаев Шавкат Мирзиёевті туған күнімен құттықтап, оның бауырлас өзбек халқының игілігі жолындағы мемлекеттік қызметіне табыс тіледі.

Президенттер екі ел ынтымақтастығының қазіргі жағдайы мен келешегін, соның ішінде Қасым-Жомарт Тоқаевтың биылғы 14-15 сәуірде Өзбекстанға жасаған мемлекеттік сапарының қорытындысы бойынша қол жеткізген уағдаластықтардың жүзеге асырылу барысын талқылады, – деп хабарлады Президенттің баспасөз қызметі.

Мемлекет басшысы Өзбекстанмен көпжақты байланыстарды кеңейтуге мүдделілік танытты.

Шавкат Мирзиеев 1957 жылы 24 шілдеде туған.