Бас ботаникалық бақ осы жылдың 1 шілдесінен 1 қарашасы аралығында жаңартылады. Бұл туралы бақтың ресми өкілі хабарлады.
Бақ ішіндегі жолдар (серуендеу жолдары, экологиялық жолдар) жөнделіп, қазаншұңқырлар дайындалады, гранит тасы қаланады, суару жүйесіне инженерлік-техникалық жұмыстар жүргізіледі (арықтарды төсеу), электр желілері жөнделіп, жарық тартылады және бейнебақылау орнатылады.
Ботаникалық бақты жаңарту 2018 жылы басталған еді. Жобаның бастамашысы ретінде Алматы әкімдігі Ботаника және фитоинтродукция институтының сұрауымен Болат Өтемұратов қоры тағайындалған.
Болат Өтемұратов қорының директоры Марат Айтмағамбетовтың айтуынша, жобаның басында бақты жабу жоспары болмаған. Кейін онда күрделі құрылыс жүргізілетіндіктен келушілердің қауіпсіздігіне байланысты бақты жабу шешімі қабылданған.
Жаңарту жұмысын ботаникалық бақтың Facebook пен Instagram желілеріндегі парақшасынан бақылай аласыз.