Бүгін — қасиетті Қадір түні. Бұл түн мың айдан да қайырлы. Ислам ғалымдары «мың ай» деген ұғымды 83 жыл 4 ай деп түсіндіреді, яғни бұл түні жасалған әрбір сауапты іс адамның 83 жыл бойы үздіксіз құлшылық еткеніне тең. Сондықтан мұсылмандар бұл түнді бос өткізбей, көбірек құлшылық етуге тырысады. Қазақстан мұсылмандары діни басқармасы Қадір түнін дұрыс өткізу жолдарын ұсынған еді.
Ислам ғұламалары қасиетті Қадір түнін былай атқаруды үндейді:
1. Бұл түнде Алла ризашылығы үшін ғибадат жасап, намаз оқып, құлдық сезімдерді арттыру керек.
2. Құран Кәрім оқылып, тыңдалып, түсінуге ынта қойып, Құран Кәрімге сүйіспеншілік пен байланыс орнатылуға тиіс.
3. Пайғамбарымызға (Алланың игілігі мен сәлемі болсын) салауат айтып, оның шапағатынан үміттеніп, оның үммбетінен болғанымызды саналы түрде сезініп, оның жолын берік ұстануымыз шарт.
4. Уағыз-насихат тыңдап, сұхбаттар құрып, күнделікті күйбең тірлік барысында жүрекке түскен кірбіңді жуып шайып, көңілге ұялаған көмескіліктен арылуға тиіспіз.
5. Қадір кешінің маңызына байланысты және Қадір түніне қатысты жеткілікті мағұлмат беретін дін адамдарымен сұхбат құру керек. Әсіресе, адам өзімен сұхбаттасып, қателігін танып, кемшілігін жоюға күш салуға, адамдармен достық қарым-қатынасын күшейтуге, бірлік пен біртұтастықты арттыруға мән беруге тиіс.
6. Тәубе мен истиғфар жасап, өз нәпсісін есептен өткізіп, қате жасаудан сақтанып, қайырлы істерді жасауға құмбыл болуы шарт.
7. Алланы зікір етіп, пікір (терең жақсы ойлану) етіп, Алланы еске алғаннан жүрек тынышталады. Ұлы Жаратушының ұшы қиыры жоқ құдіретімен жоқтан бар болған жаратылыстың сырларын нәзік пікір (жақсы терең ойланып) етіп, иманымызды күшейтуіміз қажет.
8. Жиі-жиі дұға жасауымыз керек. Өйткені дұға адамды Ұлы Жартушыға жақындататын дәнекер десек болады. Пайғамбарымыз (Алланың игілігі мен сәлемі болсын) бұл түні көбінесе мына дұғаны жасаған: «Аллаһым сен кешірімдісің, кешіруді сүйесің, мені кешіре гөр».
Бұл Қадір түнінің құрметіне Раббымыздан бүкіл мұсылманның күнәсы кешірілуін, Қадір түні жақсылыққа мұрындық болуын, достық пен бауырмашылдықты арттырып, ислам әлемінің біртұтастығын, елдің амандығын, көркеюін және күллі адамзатты апаттардан сақтауын тілеген дұрыс.
9. Қадір түнінің күндізін де бейне кеш секілді өткізу ләзім. Осылай болған болса, мүбәрак түннің рухтарға төккен шұғыласы сіңімді болып, жүректің қақ төрінен орын алары сөзсіз.
Қадір түнінде мына дұғаны оқу мустахаб: «Аллаһумма иннәкә ғафу’ун тухиббуль ғафуә, фәғфу анни!».
Мағынасы: «Уа Жаратушы ием! Сөзсіз, Сен кешірімдісің әрі кешіруді жақсы көресің. Мені кешіре гөр! Айша анамыз Алланың Елшісінен: «Қадір түнінде не айтсам болады?», – деп сұрағанда, Ол ﷺ осы дұғаны айтуды кеңес еткен [Әл-Хаким, әл-мүстәдрак –779-баб/№1985-хадис].
Ақжарқын Қыдырханова