Қырғызстан тарапы VI Дүниежүзілік көшпенділер ойындарының қорытындысында Қазақстан құрамасы бірінші орын алғанын мәлімдеді. Бұл туралы Baribar.kz хабарлап отыр.
Қырғызстан президентінің баспасөз хатшысы Аскат Алагөзовтың айтуынша, ұйымдастыру комитеті Қазақстан спортшыларының нәтижелерін қайта қарап, медальдарды бөлек есептегеннен кейін осындай шешім қабылдаған.
Қазақстанның медальдары қайта есептелді
Алагөзов ойындардың жоғары деңгейде өткенін және жарыстардың достық жағдайда аяқталғанын атап өтті. Оның сөзіне қарағанда, әсіресе көк бөрі мен жер улақ жарыстарында Қазақстан мен Қырғызстан құрамалары арасында тартысты бәсеке болған.
Командалық есептегі жалғыз техникалық сәйкессіздік медальдарды санау кезінде туындады. Бүгін ұйымдастыру комитеті Қазақстанның үш спортшысының әрқайсысының медальдарын бөлек санау туралы шешім қабылдады. Осылайша, Қазақстан жалпы командалық есепте бірінші орын алды. Қазақ бауырларымызды жеңісімен құттықтаймыз! – деп жазды Қырғызстан президентінің баспасөз хатшысы.
Ол екі елдің спортшылары мен жанкүйерлері арасындағы өзара құрметке де тоқталды. Алагөзов жарыс кезінде жанкүйерлер арасында түсініспеушілік болмағанын айтып, спортшылар мен көрермендерге алғыс білдірді.
Посмотреть эту публикацию в Instagram
Қазақстан 32 алтын алғанын хабарлаған
Бұған дейін Қазақстанның туризм және спорт министрлігі ұлттық құрама VI Дүниежүзілік көшпенділер ойындарында 74 медаль, оның ішінде 32 алтын, 20 күміс және 22 қола медаль жеңіп алғанын хабарлаған еді.
Министрліктің есебінде Қазақстан бірінші орынға, ал Қырғызстан 30 алтын медальмен екінші орынға орналасқан.
Алагөзов медаль саны спорттың бір ғана көрсеткіші екенін атап өтіп, ойындардың басты жетістігі елдер арасындағы достық пен өзара құрметті нығайту болғанын айтты.
Медальдар есебі – спорттың бір ғана құрамдас бөлігі. Ал бұл ойындардың басты жеңісі – жарысты өзара құрмет пен адал бәсеке рухында өткізе алғанымызда. Біз бауырлас халықтардың бірлігі мен ынтымағын тағы бір мәрте көрсете алдық, – деді ол.
