Атырауда туыстарының қазасынан кейін психикалық денсаулық орталығында ем қабылдаған Ақбаян Мұқанғали медициналық мекемеден шығарылды. Әйел ұзақ уақыттан кейін балаларымен кездесіп, оларды екі рет көріп үлгерген. Дегенмен оның емі әлі жалғасуы мүмкін. Бұл туралы Атырау облыстық кәмелетке толмағандарды бейімдеу орталығының директоры Құндыз Ғиният мәлімдеді. Бұл туралы Baribar.kz хабарлап отыр.
Құндыз Ғинияттың айтуынша, Ақбаян Мұқанғали біраз уақыт Атырау облыстық психикалық денсаулық орталығында ем қабылдаған. Қазір ол ауруханадан шыққан. Әйел алғаш рет ұзақ үзілістен кейін балаларымен кездескен.
Директордың сөзінше, Ақбаян Мұқанғалидің емі әлі аяқталмауы мүмкін. Әйелдің туыстары оны психикалық денсаулық орталығына тағы 10 күнге жатқызуды жоспарлап отырғанын айтқан.
«Алғаш рет ол балаларға өткен аптада келді. Жақында, бір-екі күн бұрын, екінші рет келіп, ауруханаға тағы он күнге жататынын айтты. Екі жолы да анасымен және туыстарымен бірге кешкі уақытта келді. Бірінші рет шамамен 19:30-да, екінші рет 20:30 шамасында», – деді Құндыз Ғиниятова.
Орталық директорының айтуынша, сол кезде кезекші тәрбиешілер болған. Олар Ақбаянға балаларымен кездесіп, бірге уақыт өткізуге мүмкіндік берген.
«Балаларын көптен бері көрмегендіктен, кездесуге рұқсат бердік. Оған бас тарта алмадық. Балаларын көрсін, өйткені олар да анасын күтіп жүр», – деді ол.
Қазір Ақбаян Мұқанғалидің 10, 8, 5 және 4 жастағы төрт баласы кәмелетке толмағандарды бейімдеу орталығында тұрып жатыр. Ал бір жарым жастағы кенже ұлы мамандандырылған сәбилер үйінде қалып отыр.
Құндыз Ғинияттың айтуынша, әйел емдеудің келесі кезеңінен өткен соң мамандар оның жағдайына қайта бағалау жүргізуі керек.
«Одан кейін оның жағдайын тағы бір рет бағалау қажет. Егер жағдайы жақсы болса, анасы балаларын өзіне алып кетуі мүмкін», – деді орталық директоры.
Орталықтың мәліметінше, балалардың денсаулығы қанағаттанарлық, эмоционалдық жағдайы тұрақты.
Үш бала орталыққа 2 ақпанда орналастырылған. Тағы бір қызы 9 сәуірде сәбилер үйінен кәмелетке толмағандарды бейімдеу орталығына ауыстырылған. Ал ең кішкентай ұлы әзірге сәбилер үйінде қалып отыр.
Үлкен балалар білім алуын жалғастырып жатыр. 10 жастағы қызы төртінші сыныпта, 8 жастағы ұлы үшінші сыныпта оқиды.
Балалардың оқу процесінен қол үзіп қалмауы үшін мұғалімдер орталыққа арнайы келіп, сабақтарды бекітілген кестеге сәйкес өткізіп жатыр.
Орталықтың хабарлауынша, тәрбиеленушілердің білім алу құқығын қамтамасыз ету және олардың оқу процесінен шет қалмауы үшін оқу-тәрбие жұмыстары жүйелі түрде ұйымдастырылған.
Еске салайық, бұған дейін Атырау облысының қылмыстық істер жөніндегі мамандандырылған ауданаралық соты бір отбасының төрт мүшесін өлтірді деп айыпталған Сұлтан Сәрсемәлиді кінәлі деп танып, өмір бойына бас бостандығынан айырған еді.
