Американың атақты рэп орындаушысы Йе (Канье Уэст) осы жылдың қазан айында Санкт-Петербургте екі ірі концерт беретінін хабарлады. Бұл кейінгі төрт жылдағы Ресейде өнер көрсететін ең ірі батыс жұлдызы. Хабарландыру жарияланғаннан кейін 70 мың адамға арналған «Газпром Аренадағы» билеттер бірнеше сағат ішінде толығымен сатылып кетті. Билет бағасы 9,000 рубльден 160,000 рубльге (шамамен 49 000–870 000 теңге) дейін жеткен. Бұл туралы Baribar.kz хабарлап отыр.
Ұлыбританияның елге кіруге тыйым салуы және Еуропадағы бірнеше концерттің тоқтатылуы
Бұл концерттер Уэсттің бірнеше жыл бойы жасаған антисемит және нацист сипаттағы мәлімдемелерінен кейін беделін қалпына келтіруге тырысып жатқан кезеңіне тұспа-тұс келіп отыр. Ол биылғы қаңтар айында өзінің бұл әрекеттерін ми жарақатымен және биполяр бұзылысымен түсіндіріп, ресми түрде кешірім сұраған еді.
Дегенмен жаздағы Еуропа туры сәтсіздікке ұшырады. Ұлыбританияның Ішкі істер министрлігі рэп орындаушының елде болуы «қоғамдық игілікке сай келмейді» деген негізбен оған елге кіруге тыйым салды. Осының салдарынан Ұлыбританиядағы әйгілі Wireless фестивалі толығымен тоқтатылды.
Франция, Польша, Италия және Чехиядағы концерттері тоқтатылды. Ал Испания, Португалия, Нидерланды, Түркия мен Албаниядағы шоулары жоспар бойынша өтті. Мадридте өткен шоудан кейін RTVE басылымы көрермендердің 60%-ы өз елдерінде концертті тамашалай алмаған шетел азаматтары болғанын атап өтті. Көрермендер Уэсттің алып жарықдиод күмбездегі сахна қойылымын жоғары бағалап, оның музыкаға құштарлығы қайта оралғанын жазды.
Ресей реакциясы және саясаткерлер пікірі
Кейінгі жылдары Ресейде негізінен Tyga, DaBaby, Akon, Lil Pump, Jason Derulo сияқты екінші эшелондағы орындаушылар ғана өнер көрсетіп жүрген еді. Канье Уэсттің келуі елеулі оқиға болғанымен, бұл жаңалықты Ресей саясаткерлерінің бәрі бірдей қуана қабылдаған жоқ.
Консерватор депутат Виталий Милонов рэп орындаушыға өзінің әдеттегі репертуарының орнына дәстүрлі орыс әндерін айтуды ұсынды:
«Мүмкін осыдан кейін ол өзінің жағымсыз қылықтарын қойып, қалыпты адамға айналатын шығар», – деді ол.
«Мен нацист те, антисемит те емеспін»
Канье Уэсттің даулы мәлімдемелері 2022 жылы басталып, Adidas пен Balenciaga сияқты ірі брендтер онымен келісімшартты үзген болатын. Биыл қаңтарда Wall Street Journal газетінде жарияланған толық бет жарнамасында ол: «Мен нацист те, антисемит те емеспін» деп жазды. Алайда кейбіреулер оның жариялану уақытын күмәнді деп бағалады.
Еске сала кетейік, Канье Уэстің (Ye) Алматыдағы Орталық стадионда 14 тамызға жоспарланған концерті қолайсыз ауа райы мен қаланың электр жүйесіндегі ақауларға байланысты 15 тамызда өтті.
