Қостанай облысында сот шешімімен «Светофор» балалар сауықтыру орталығының қызметі тоқтатылды. Бұған ата-аналардың бірінің өтінішінен кейін жүргізілген жоспардан тыс тексеру себеп болған. Бұл туралы Baribar.kz хабарлап отыр.
Тексеру барысында ата-ананың шағымында көрсетілген деректер расталған.
Санитариялық талаптардың бұзылғаны анықталды
Денсаулық сақтау министрлігінің мәліметінше, тексеру кезінде:
- тамақтануды ұйымдастыру талаптарының;
- сумен қамтамасыз ету нормаларының;
- аумақ пен үй-жайлардың санитариялық жағдайына қойылатын талаптардың;
- қызметкерлердің міндетті медициналық тексеруден өту тәртібінің бұзылғанын анықтады.
Материалдарды қарау қорытындысы бойынша сот орталықтың қызметін тоқтату туралы шешім қабылдады, ал бұған дейін берілген санитариялық-эпидемиологиялық қорытындының күші жойылды, – деп мәлімдеді денсаулық сақтау министрлігі.
Кінәлі тұлғалар жауапқа тартылды
Ведомствоның мәліметінше, аталған орталыққа санитариялық-эпидемиологиялық қорытынды беру кезінде заңбұзушылықтарға жол берген лауазымды тұлғаларға қатысты қызметтік тексеру жүргізілді.
Тексеру қорытындысы бойынша кінәлі қызметкерлер тәртіптік жауапкершілікке тартылды.
