WhatsApp Web-те қоңырау шалуға болады: қолданба қолданушыларына арналған бірқатар жаңа мүмкіндіктерді таныстырды. Енді пайдаланушылар WhatsApp Web арқылы аудио және бейнеқоңырау шалып, қабылдай алады. Бұл туралы Baribar.kz хабарлап отыр.
Компания мәліметінше, енді браузер арқылы қосымша жүктемей-ақ жеке және топ қоңырауларына қатысуға мүмкіндік бар. Бұл, әсіресе ортақ компьютер пайдаланатын студенттерге немесе жұмыс ноутбегіне қосымша орнатуға рұқсаты жоқ адамдарға қолайлы.
WhatsApp Web нұсқасында экранды көрсету, реакциялар жіберу, қоңыраулар тарихын көру және таңдаулы контактілер тізімін пайдалану сияқты функциялар да қолжетімді болады.
WhatsApp барлық қоңыраудың соңына дейін шифрлау технологиясымен қорғалатынын мәлімдеді. Қоңыраулардың ұзақтығына шектеу қойылмайды және олар тегін ұсынылады.
Жаңартулардың тағы бірі – қоңырауды бір құрылғыдан екіншісіне ауыстыру мүмкіндігі. Енді топтық қоңырауды тоқтатпай-ақ оны телефоннан компьютерге немесе керісінше көшіруге болады.
Мессенджерде күту залы (Waiting Room) функциясы іске қосылды. Қоңырау сілтемесін жасағанда арнайы рұқсат беру мүмкіндігі қосылса, қатысушылар алдымен күту залына түседі. Бұл топ қоңырауларына кімнің және қашан қосылатынын бақылауға мүмкіндік береді.
Бұдан бөлек, QuickHD технологиясының арқасында бейнеқоңыраудың алғашқы секундтарынан-ақ жоғары сапалы кескін көрсетіледі. Ал шуды басу (Noise Suppression) функциясы шулы ортада да әңгімелесушінің дауысын анық естуге көмектеседі.
Компания мәліметінше, жаңа мүмкіндіктер кезең-кезеңімен енгізіліп жатыр және жақын уақытта барлық пайдаланушыға қолжетімді болады.
