Шымкентте дарынды балаларға арналған жазғы лагерь жұмысын жалғастырды. №2 Оқушылар сарайының дендросаябақ аумағында ұйымдастырылған лагерьде оқушылар жазғы демалысын тиімді өткізіп, білімін жетілдіруге, шығармашылық қабілетін дамытуға және жаңа дағдыларды меңгеруге мүмкіндік алып отыр.
Лагерьдің әр ауысымына оқу үлгерімімен, зияткерлік байқаулардағы жетістіктерімен, шығармашылық жобаларымен және басқа да бағыттардағы нәтижелерімен ерекшеленген 30 оқушы қатысады. Балаларға арналған 12 күндік бағдарламаға білім беру сабақтары, танымдық кездесулер, шеберлік сабақтары, шығармашылық іс-шаралар, спорттық жарыстар мен зияткерлік ойындар енген.
Мұндай формат оқушылардың бос уақытын қызықты өткізуімен қатар, жаңа білім алып, ой-өрісін кеңейтуіне және өз қызығушылықтары ортақ құрдастарымен танысуына мүмкіндік береді.
Лагерь қатысушыларының жайлы демалысына да ерекше көңіл бөлінген. Оның аумағында бассейн, жаттығу залы, кітапхана және түрлі білім беру мен шығармашылық үйірмелер жұмыс істейді. Сонымен қатар балалар үшін мәдени-танымдық шаралар, концерттік бағдарламалар, командалық сайыстар мен зияткерлік ойындар тұрақты ұйымдастырылады.
Ұйымдастырушылардың айтуынша, лагерьдің негізгі мақсаты – балалардың демалып қана қоймай, білімін жетілдіруіне, көшбасшылық қасиеттерін қалыптастыруына, қарым-қатынас дағдыларын дамытуына және шығармашылық ойлау қабілетін шыңдауына қолайлы орта қалыптастыру.
Мұндай жобалар оқушылардың жазғы демалысын пайдалы өткізуіне, жаңа тәжірибе жинақтап, оқу мен қоғамдық өмірдегі жетістіктерге деген ынтасын арттыруға ықпал етеді.
Шымкент қаласының әкімдігінде дарынды балаларды қолдау маңызды бағыттардың бірі болып қала беретінін атап өтті. Білім беру инфрақұрылымын дамыту және осындай лагерьлер ұйымдастыру өскелең ұрпақтың жан-жақты дамуына, қабілетін ашуына және өз әлеуетін толық пайдалануына қосымша мүмкіндік береді.
