Ресей билігі Telegram мессенджерінің негізін қалаушы Павел Дуровқа терроризмге жәрдемдесті деген айып тағып, оны халықаралық іздеуге жариялады. Ресейдің Федералдық қауіпсіздік қызметі (ФҚҚ) мессенджер Украина арнайы қызметтерінің Ресей аумағындағы әрекеттеріне пайдаланылған деп мәлімдеді. Бұл туралы Baribar.kz хабарлап отыр.
Халықаралық іздеу жарияланды
ФҚҚ мәліметінше, Telegram арқылы Ресей аумағында диверсиялық және террористік әрекеттерді дайындау мен үйлестіру жүзеге асырылған. Ресей тарапы платформа Украина пайдаланған арналарды, чаттар мен боттарды жоймағанын да алға тартты.
Осыған байланысты Ресейде туған, қазір шетелде тұратын Павел Дуровты ұстауға халықаралық ордер берілген.
Айып тағылғаны туралы ақпарат тарағаннан кейін Telegram-ның X желісіндегі ресми парақшасында Дуровтың ортаңғы саусағын көрсетіп тұрған суреті жарияланды. Бұған дейін кәсіпкер Ресей билігін азаматтардың Telegram-ға қолжетімділігін шектеу үшін жаңа себептер ойлап табуға тырысып жатыр деп айыптаған.
Дуров Ресейден неге кеткен?
41 жастағы Павел Дуров көп жылдан бері Ресейден тыс жерде тұрады. Оның Франция және Біріккен Араб Әмірліктерінің азаматтығы бар.
Дуров 2014 жылы Ресей билігінің платформадағы оппозициялық қауымдастықтарды жабу туралы талабын орындаудан бас тартқаннан кейін елден кеткен. Telegram-ға дейін ол Ресейдегі ең танымал әлеуметтік желілердің бірі – «ВКонтакте» желісінің негізін қалаған.
Ресей берген ордерді басқа мемлекеттердің орындайтыны әзірге белгісіз.
Telegram-ды 950 миллионға жуық адам пайдаланады
Telegram Ресейде кең таралған мессенджерлердің бірі. Оны елде ондаған миллион адам қолданады. Платформа Украинада да танымал.
Жалпы әлем бойынша Telegram аудиториясы шамамен 950 миллион адамға жеткен. Компания өзін пайдаланушылардың құпиялылығына басымдық беретін мессенджер ретінде таныстырып келеді.
Telegram бұған дейін контентті модерациялау мәселесіне байланысты сынға ұшыраған. Компания платформадағы қауіпсіздік шаралары жеткіліксіз деген айыптауларды жоққа шығарып келеді.
2024 жылы Павел Дуров Францияда ұсталып, Telegram-дағы қылмыс әрекеттерінің алдын алу үшін жеткілікті шара қолданбады деген күдікпен ресми тергеуге алынған. Кейін оған елден шығуға рұқсат берілді, алайда тергеу жалғасып жатыр.
