Шымкент қаласының әкімдігі аптап ыстық кезінде жануарларға қамқор болуға шақырды. Жаздың ыстық ауа райы адамдарға ғана емес, жануарларға да қиын. Әсіресе, су тапшылығы мен көлеңкелі орындардың аздығы олардың денсаулығына кері әсер етуі мүмкін.
Осыған байланысты қала әкімдігі тұрғындарды төрт аяқты жануарларға бейжай қарамауға үндеді. Мамандардың айтуынша, аптап күндері қарапайым көмек те жануарлардың ыстықты жеңіл өткеруіне ықпал етеді. Мәселен, үйдің, жұмыс орнының немесе демалыс аймағының маңында жануарлар жиі жүретін болса, қауіпсіз жерге таза ауызсу құйылған ыдыс қойып қоюға болады.
Мұндай бастама, әсіресе, иесіз жануарлар үшін маңызды. Олар ыстық күндері су іздеп, ұзақ уақыт бойы көлеңке мен салқын орын таба алмай жүруі мүмкін. Сондықтан тұрғындардың қолжетімді жерге су қоюы жануарлардың шөлін басып, аптаптың әсерін азайтуға көмектеседі.
Әкімдік өкілдері үндеудің кафе, мейрамхана, дүкен және басқа да кәсіпкерлік нысандардың иелеріне де қатысты екенін атап өтті. Жаздың ыстық күндерінде жануарлар ғимараттардың көлеңкесіне тығылып, салқын жер іздейді. Осыған байланысты бизнес нысандарының маңында жүрген жануарларға түсіністікпен қарап, мүмкіндік болса, ғимараттың жанына суы бар ыдыс қою ұсынылады.
Қала әкімдігі тұрғындарды жануарларға қатысты жауапкершілікпен қарап, оларға қолынан келгенше көмек көрсетуге шақырды. Қарапайым ғана әрекет – су беру немесе көлеңкелі жерге жағдай жасау – аптап ыстықта жануардың өмірін сақтап қалуы мүмкін.
Жануарларға қамқорлық жасау қоғамдағы мейірімділік пен жауапкершілік мәдениетінің бір бөлігі саналады. Әсіресе ауа температурасы жоғары күндері адамдардың назар аударып, көмек көрсетуі жануарлардың ыстықты қауіпсіз өткізуіне мүмкіндік береді.
