WhatsApp қолданушыларына бір смартфонда екі аккаунтты қатар пайдалануға мүмкіндік беретін жаңа функция пайда болды. Енді жұмысқа және жеке өмірге арналған WhatsApp аккаунттарын бір құрылғыға тіркеп, бір-бірінен оңай ауысуға болады. Бұл туралы Baribar.kz хабарлап отыр.
Екі аккаунтты пайдалану үшін не істеу керек?
Екі WhatsApp аккаунты әртүрлі телефон нөміріне тіркелуі керек. Яғни екінші аккаунтты қосу үшін екінші телефон нөмірі қажет.
Екі аккаунт бір уақытта жүйеге кіріп тұрады. Сондықтан пайдаланушыға бір аккаунттан шығып, екіншісіне қайта кірудің қажеті жоқ. Олардың арасында WhatsApp қолданбасының ішінде ауысуға болады.
WhatsApp қай аккаунт қолданылып тұрғанын ажыратуды да жеңілдеткен. iOS-та белсенді аккаунттың профиль суреті төменгі мәзірде көрсетіледі.
iPhone қолданушыларына да қолжетімді
Бір құрылғыда екі WhatsApp аккаунтын пайдалану мүмкіндігі Android жүйесінде бұған дейін болған. 2026 жылғы наурызда компания бұл функцияны iOS қолданушыларына да іске қосты.
Осылайша iPhone иелері де жұмысқа арналған бір нөмірді, ал жеке хат алмасуға екінші нөмірді пайдаланып, екі аккаунтты бір смартфонда басқара алады.
Жаңалық жұмыс және жеке хат алмасуларды бөлек жүргізгісі келетіндерге екі телефон алып жүру қажетін азайтады.
Бұл туралы WhatsApp-тың бас компаниясы Meta 2026 жылғы 26 наурызда ресми хабарлады.
