Өскемен гарнизонындағы әскери бөлімдердің бірінен қызмет орнын өз еркімен тастап кеткен мерзімді әскери қызметші ұсталды. Бұл туралы Baribar.kz хабарлап отыр.
Сарбаз қай жерден табылды?
Қарулы күштері әскери полициясы бас басқармасының мәліметінше, қатардағы Мархан А.Е. облыс орталығынан шамамен 20 шақырым жерден табылған. Ол әскери полиция бөліміне жеткізілген.
Ведомствоның мәліметінше, сарбаздың өмірі мен денсаулығына ешқандай қауіп жоқ.
Алдын ала себеп қандай?
Алдын ала мәлімет бойынша, әскери қызметшінің бөлімнен кетуіне үйін сағынуы себеп болған. Сонымен қатар тексеру барысында сарбаз командирлер немесе бірге қызмет атқарып жүрген әскери қызметшілер тарапынан әлімжеттік пен қызметтік өкілеттікті асыра пайдалану фактілері болмағанын мәлімдеген.
Қазір аталған дерек бойынша тексеру жүргізіліп жатыр. Оқиғаның себептері мен барлық мән-жайы анықталып жатыр.
