Қолтықтың терлеуін қалай азайтамыз? Дерматологтар ұсынған кеңестер

Дезодорант емес, антиперспирант қолданыңыз

Терлеуді азайту үшін дезодорант емес, антиперспирант таңдаған жөн. Антиперспирант тер бөлінуін тікелей шектейді, ал дезодорант терді тоқтатпайды — ол тек жағымсыз иісті бүркемелеуге немесе жоюға арналған.

Қос өнімді де пайдаланғыңыз келсе, мынадай нұсқалар бар:

• Кешенді өнім: Құрамында антиперспирант та, дезодорант та бар құралды таңдау.

• Маман тағайындаған өнімдер: Дерматолог арнайы антиперспирант жазып берсе, оны кешке ұйықтар алдында құрғақ теріге жағыңыз. Ал дезодорантты таңертең оянғанда қолданыңыз. Антиперспирантты таңертең де қайталап жағу қажет болса, дезодорантты қай уақытта жаққан дұрыс екенін дәрігеріңізден анықтап алыңыз.

• Рецепт бойынша берілетін антиперспиранттар: Мұндай өнімдерді дәрігер нұсқаулығына сәйкес қана пайдаланыңыз. Оны маман белгілеген аймақтарға (алақан, аяқ басы немесе тізе арты сияқты) жағу керек. Оларды көбіне түнде құрғақ теріге, қажет болса, таңертең қайталап жағатыныңызды ескеріңіз.

Бүкіл денеге арналған дезодоранттар тиімді ме?

Қазіргі таңда бүкіл денеге жағуға арналған дезодоранттар (whole-body deodorant) бар. Бұл өнім иісті басуға көмектесетіндей болып көрінгенімен, дерматологтар оның тиімділігі мен ыңғайлылығына күмәнданады және оны қолдануда абай болуды ескертеді.

Терлеу күнделігін жүргізіңіз

Қай кезде және қандай жағдайда қатты терлейтініңізді анықтау үшін «терлеу күнделігін» бастаңыз. Оның себебі әр адамда әртүрлі болады.

Күнделікті қалай жүргізеді?

Терлеу күшейген сәттерді және дәл соның алдында не істегеніңізді немесе не жегеніңізді жазып отырыңыз.

Жиі кездесетін себептер:

• Тағамдар мен сусындар: ыстық шақ, ащы тағамдар, кофеин, майлы, тәтті, тұзды және ақуызға бай астар, алкоголь.

• Эмоциялар: мазасыздық, қобалжу, қорқыныш және күйзеліс (стресс).

Себепті анықтаған соң, олардан барынша аулақ болуға тырысыңыз. Бұл тер бөлгіш бездер жұмысын тұрақтандыруға көмектеседі.

Кофеин мен стимуляторларды шектеңіз

Тамақ пен сусындардағы кофеин мен теобромин (theobromine) — гипергидрозды қоздыратын басты элементтер. Осы заттар терлеуді күшейтетін болса, мына өнімдерден бас тартқан немесе азайтқан абзал:

• Кофе;

• Құрамында кофеины бар шайлар;

• Кола сияқты газдалған сусындар;

• Шоколад;

• Какао.

Киім таңдауға мән беріңіз

Дерматологтар гипергидрозбен күресушілерге мынадай кеңестер береді:

• Ауа өткізетін маталар: Мақта сияқты табиғи материалдардан тігілген киімдер терінің тыныс алуына мүмкіндік береді.

• Қосалқы киім: Өзіңізбен бірге ауыстыратын құрғақ киім алып жүріңіз.

• Арнайы төсемдер: Киімде тер дақтары қалмауы үшін қолтық астына арналған сіңіргіш төсемдер пайдаланыңыз.

Аяқ күтімін ұмытпаңыз

Аяқ та шамадан тас терлесе:

• Аяқкиім мен шұлықты жиі ауыстырыңыз: бір аяқкиімді екі күн қатарынан кимеңіз.

• Арасында аяқкиімді шешіп тұрыңыз: мүмкіндік болғанда аяқкиімді шешіп, аяқты желдетіңіз. Бұл жағымсыз иістің, терінің тітіркенуінің және инфекциялардың алдын алады.

• Табиғи материалдар: ауа жақсы өтетін табиғи материалдардан жасалған аяқкиімді таңдаңыз.

• Ылғал тартатын шұлықтар: бамбук талшықтары ылғалды табиғи түрде жақсы сіңіреді. Ал полиэстер мен нейлоннан жасалған шұлықтарды сатып алғанда, олардың сыртында «moisture-wicking» деген арнайы белгісі бар екеніне көз жеткізіңіз (себебі синтетиканың бәрі бірдей мұндай қасиетке ие емес).

• Арнайы ұнтақтар мен ұлтарақтар: ылғалды сіңіретін ұлтарақтар мен аяққа арналған ұнтақтар пайдаланыңыз.

Суды жеткілікті мөлшерде ішіңіз

Көп терлеу ағзаның сусыздануына (дегидратация) себеп болады.

Маңызды: Ішетін су мөлшерін көбейтпес бұрын дәрігеріңізбен кеңесіңіз. Қажет су көлемі денсаулығыңызға, қабылдайтын дәрілеріңізге, физикалық белсенділігіңізге және ағзаның басқа да ерекшеліктеріне байланысты.

Психикалық денсаулығыңызға көңіл бөліңіз

Шамадан тыс терлеу мазасыздық, қобалжу немесе депрессия тудыра ма? Психологиялық кеңес алу, қолдау топтарына қосылу немесе гипергидроз туралы біліміңізді арттыру мұны жеңілдетуге көмектеседі.

Дерматологтар шамадан тыс терлеудің өмір сапасын төмендететінін жақсы түсінеді. Білікті маманмен бірге емдеу жоспарын құру арқылы сіз терлеуді толықтай бақылауда ұстай аласыз. Гипергидроз күнделікті өміріңізге кедергі келтірсе, міндетті түрде дерматолог дәрігерге қаралғаныңыз жөн.