Астана әуежайында қоғамдық тәртіпті бұзған 36 жастағы әйел «Астана – Шымкент» рейсінен түсірілді. Бұл туралы Baribar.kz хабарлап отыр.
Мас күйде жанжал шығарған
Полиция мәліметінше, әуе компаниясы өкілдерінің актісі негізінде көліктегі полиция басқармасының қызметкерлері рейстен Шымкенттің 36 жастағы тұрғынын түсірген.
Мән-жайды анықтау барысында әйелдің мас күйде болғаны, былапыт сөздер айтып, агрессивті мінез көрсеткені және полиция қызметкерлерінің заңды талаптарына бағынбағаны белгілі болды.
Посмотреть эту публикацию в Instagram
Іс сотқа жолданды
Құқық бұзушыға ҚР әкімшілік құқық бұзушылық туралы кодексінің үш бабы бойынша әкімшілік хаттама толтырылды.
Атап айтқанда, оған:
- қоғамдық орында мас күйінде жүргені;
- ұсақ бұзақылық жасағаны;
- полиция қызметкерінің заңды талабына бағынбағаны үшін жауапкершілік жүктелді.
Көліктегі полиция департаментінің мәліметінше, іс материалдары процестік шешім қабылдау үшін сотқа жолданған.
