Түркістан облысында екі жеңіл көліктің бетпе-бет соқтығысуы салдарынан жеті адам қаза болды. Қайғылы оқиға Шаян – Екпінді автожолында болған. Бұл туралы Baribar.kz хабарлап отыр.
Облыстық ПД мәліметінше, Toyota Camry мен Volkswagen Passat автокөліктері бетпе-бет соқтығысқан. Апат салдарынан екі көліктегі жеті адам оқиға орнында қаза болған.
Қылмыстық іс қозғалды
Түркістан облысы полиция департаментінің мәліметінше, адам өліміне әкелген жол-көлік оқиғасына байланысты сотқа дейінгі тергеу басталды.
Қазір жол апатының нақты себептері мен барлық мән-жайы анықталып жатыр. Полиция жүргізушілерді жол қозғалысы ережелерін қатаң сақтауға, жылдамдықты жол жағдайына сай таңдауға және рөлде аса мұқият болуға шақырды, — делінген хабарламада.
