2026 жылдың мамыр айының қорытындысы бойынша Қазақстан экономикасына берілген кредиттің жалпы көлемі 51,5 трлн теңгеге жетті. Бұл өткен жылдың сәйкес кезеңімен салыстырғанда 17,8%-ға, яғни 7,8 трлн теңгеге көп. Бұл туралы Baribar.kz хабарлап отыр.
Ranking.kz мәліметінше, жалпы өсімнің 82%-ы немесе 6,4 трлн теңгесі екінші деңгейлі банктердің үлесіне тиесілі. Нәтижесінде банктердің кредиттік портфелі 43,8 трлн теңгеге дейін ұлғайып, экономикадағы барлық кредиттің 85%-ын қамтамасыз еткен.
Банктен тыс секторда да өсім байқалды. Квазимемлекеттік ұйымдардың кредиттік портфелі бір жылда 39,5%-ға артып, 4,3 трлн теңге болды. Ал микроқаржы ұйымдарының кредит көлемі 3,2 трлн теңгеге жетсе, ипотекалық ұйымдардың портфелі 5,2%-ға қысқарған.
Сарапшылардың айтуынша, бизнеске берілетін кредиттердің өсімі халыққа берілетін қарыздарға қарағанда жоғары болды. Бір жыл ішінде кәсіпкерлерге берілген кредит көлемі 20,5% өсіп, 24,2 трлн теңгеге жетті. Ал жеке тұлғаларға берілген кредиттер 15,5% артып, 3,7 трлн теңгеге көбейген.
Екінші деңгейлі банктер мен Қазақстанның Даму банкінің экономикаға берген кредиттік портфелі 44,5 трлн теңгені құрап, бір жылда 17% өсті. Банк портфелінің құрылымында да өзгеріс байқалады. Кәсіпкерлерге берілген кредиттердің үлесі 41,8%-дан 42,7%-ға дейін ұлғайса, халыққа берілген кредиттердің үлесі 58,2%-дан 57,3%-ға дейін төмендеген. Ең жоғары өсім шағын кәсіпкерлікті қаржыландыруда тіркелді. Шағын бизнеске берілген кредиттер бір жылда 34% артып, 8,9 трлн теңгеге жеткен. Орта кәсіпкерлікке берілген кредиттер 22,8% өсіп, 3,1 трлн теңге болды. Ал ірі кәсіпорындарға берілген кредит көлемі 3,7%-ға ғана ұлғайып, 7 трлн теңгеге жетті. Сонымен қатар бөлшек кредит портфелі 25,5 трлн теңге болды. Оның ішінде тұтынушылық кредиттер 17,1 трлн теңгеге, ипотекалық кредиттер 7,3 трлн теңгеге жеткен, — делінген хабарламада.
Ranking.kz сарапшыларының пікірінше, бұл көрсеткіштер Қазақстанда кәсіпкерлікті қаржыландырудың рөлі біртіндеп күшейіп келе жатқанын көрсетеді.
