Қазақстанда 2025 жылдың қаңтар–шілде айларында 608,8 мың тонна ет өндірілді, оның ішінде 205,7 мың тоннасы сиыр еті.
Бұл туралы ауыл шаруашылығы министрлігі хабарлап отыр.
Министрліктің мәліметніше, елдегі ірі қара мал басы 8,7 миллионға жеткен, соның ішінде 4,5 миллионы сиыр, 2,7 миллионы бұзау. Бұл көрсеткіштер өндіріс көлемін арттыруға мүмкіндік береді.
Алайда нарықта сиыр еті қымбаттап отыр. Бұған субсидияның тоқтауы, энергия ресурстары мен жем-шөптің, жанар-жағар май мен ветеринарлық препараттардың қымбаттауы әсер еткен. Сонымен қатар делдалдар мен сыртқы нарықтағы жоғары сұраныс та ықпал етіп жатыр. 2025 жылдың алғашқы жартысында ет экспорты 16,1 мың тоннаға жетіп, былтырғыдан 2,4 есе артқан. Негізгі бағыттар – Өзбекстан, Тәжікстан, Қырғызстан, Қытай және БАӘ, — делінген хабарламада.
Қазіргі таңда бордақылау алаңдарының жүктемесі 35–40% деңгейінде. Оны арттыру үшін мемлекет жылдық 5%-бен жеңілдетілген несие бағдарламасын іске қосты. Бұл бағдарлама жас мал мен жем-шөп сатып алуды, бордақылау алаңдарының қуатын 60%-ға жеткізуді көздейді.