Ұлттық банктің ақша-кредит саясаты комитеті базалық мөлшерлемені +/- 1 п.т. дәлізімен жылдық 16,5% деңгейінде сақтау туралы шешім қабылдады.
Бұл шешім болжамды раундтың нәтижелеріне негізделді. Оның аясында негізгі макроэкономикалық көрсеткіштердің болжамы жаңартылып, инфляция тәуекелдерінің балансы қайта бағаланды, — делінген хабарламада.
Ұлттық банктің мәліметінше, жылдық инфляция шілде айында 11,8% деңгейінде сақталды. Азық-түлік және азық-түлікке жатпайтын тауарлар бағасы өскен, ал қызметтер бағасы жыл басынан бері алғаш рет баяулап отыр. Айлық инфляция 0,7%-ға дейін баяулағанымен, орташа жылдық мәндерден едәуір жоғары қалыптасқан. Сыртқы сектордың бағаларға әсері сақталып отыр. Азық-түліктің әлемдік бағасы өсіп барады. Көрші Ресейде инфляция баяулағанына қарамастан жоғары деңгейде қалып отыр.
2025 жылға инфляцияның болжамы нақтыланды. Ортамерзімді кезеңде болжамды бағалау өзгерген жоқ. 2025 жылы инфляция – 11-12,5%, 2026 жылы – 9,5-11,5%, 2027 жылы – 5,5-7,5% шегінде күтіледі. Болжам жекелеген азық-түлік нарықтарында бағаның күрт өсуіне, сұраныс жағынан инфляциялық қысымның күшеюіне байланысты нақтыланды. Қазақстан экономикасының 2025 жылға арналған өсім болжамы 5,5-6,5%-ға дейін жақсарды. Экономикалық өсімнің қазіргі қарқыны жоғары қалыптасуына орай, жоғары инвестициялық белсенділікке және орнықты тұтынушылық сұранысқа байланысты болжам қайта қаралды. 2026 жылға болжам 4-5% деңгейінде сақталды, — деді Ұлттық банк.
Ұлттық банктің ақша-кредит саясаты комитеті алдағы отырыстарда базалық мөлшерлемені көтерудің орындылығын қарастырмақ. Қабылданған шешім факторлары мен болжам туралы толық ақпарат 3 қыркүйекте Ұлттық банктің ресми интернет-ресурсында ұсынылады.
Базалық мөлшерлеме бойынша кезекті жоспарлы шешімі 10 қазанда Астана уақытымен сағат 12:00-де жарияланады.