Қазақстанда кісі өлтіру, қарақшылық, тонау, бұзақылық, ұрлық және мал ұрлығы азайды. Бұл туралы ішкі істер министрі Ержан Сәденов айтты.
Оның айтуынша, мемлекет басшысының тапсырмаларын орындау аясында қауіпсіз қала және ауылдық орта құру шаралары жүзеге асырылып жатыр. Қазіргі таңда 14 мыңнан астам полиция қызметкері мен ұлттық ұлан әскери қызметшілері қоғамдық тәртіпті қамтамасыз етіп жатыр.
Жыл басынан бері 15 мыңнан астам патрульдеу маршруты әзірленіп, 10 мыңнан астам қылмыс ашылған. Сонымен қатар 10 миллионға жуық әкімшілік құқық бұзушылықтың жолы кесілді.
Алдын алу шараларының арқасында қылмыстар саны өткен жылмен салыстырғанда 13%-ға, яғни 9 мыңға азайды. Бұрын сотталғандар жасайтын және қоғамдық орындарда болатын құқық бұзушылықтар да саябырсыды, – деді министр Ержан Сәденов.