Не болды?
«Қазақтелеком» ұлттық байланыс операторы бәсекеге кедергі болатын әрекеттер жасаған. Бұл туралы Бәсекелестікті қорғау және дамыту агенттігі хабарлап отыр.
Мәлімет
«Қазақтелеком» көпқабатты үйлерге интернет орнатқанда өзге операторларға тосқауыл қойған. Оған қоса кабельді-кәріз желілеріне қосылу шарты заңсыз төлеммен берілген.
Сонымен қатар «Қазақтелеком» монополиялық жоғары баға белгілеп отырған. Бұған дейін компанияға қатысты тергеп-тексеру басталған еді, — делінген агенттік хабарламасында.
Ұлттық байланыс операторы 2024 жылы жылдамдығы 100 Мбит/сек, 200 Мбит/сек және 500 Мбит/сек дейінгі интернет тарифтерін 20%-ға дейін қымбат сатқан.
Агенттік ұсынысы арқылы радиожиілік спектрін бөлу кезіндегі шектеулер алынып тасталды. «Байланыс туралы» заңға виртуал операторларды заңдастыру және қуаттарды жалға беру жөнінде түзету енген.