Не болды?
Алматы облысы, Қарасай ауданындағы Шамалған ауылының маңында орналасқан ауыл шаруашылығы мақсатындағы ірі жер телімі аукцион арқылы 217 миллион теңгеге сатылды. Бұл туралы Қайтарылған активтерді басқару компаниясы (ҚАБК) хабарлап отыр.
Мәлімет
Қайтарылған активтерді басқару компаниясының хабарлауынша, жер телімінің жалпы аумағы — 4,5 мың гектардан асады. Ол бұған дейін белгілі кәсіпкер Қайрат Боранбаевқа тиесілі «Алмалы» холдиңі меншігінде болған. Жер бастапқы бағасымен — 217 млн теңгеге сатылып, аукционда жеңіске жеткен қатысушы мен сатушы 10 жұмыс күні ішінде сатып алу-сату шартын рәсімдеуге тиіс. Жаңа иесі ақысын толық төлеген соң ғана жерге иелік етеді. Түскен қаражат түгелдей Арнайы мемлекеттік қорға аударылады.
Контекст
Бұл аукцион ҚАБК шілде айының соңында жарияланған жер телімдерін сату шеңберінде өтті. Жалпы 10 жер учаскесі сатылымға шығарылған, олардың жартысы Шамалған ауылы маңында орналасқан.
Анықтама
ҚАБК (Қайтарылған активтерді басқару компаниясы) — жемқорлықпен күрес аясында мемлекетке қайтарылған мүліктерді есепке алып, оларды тиімді пайдалану және сатуға шығару жұмыстарын жүргізетін мемлекеттік орган.
Қайрат Боранбаев — танымал қазақстандық кәсіпкер, бұған дейін біршама активі мемлекетке қайтарылған.