Жазғы демалыс қызып тұрған шақта Алакөл көлі жағалауында демалушылардың қауіпсіздігін қамтамасыз етуге бағытталған ауқымды дайындық жұмыстары жүргізілді.
Биылғы шомылу маусымы басталмай тұрып, төтенше жағдайлар департаменті (ТЖД), жергілікті атқарушы органдар, полиция және БАҚ өкілдері қатысқан арнайы баспасөз туры өтті. Қатысушылар ТЖД-ның су-құтқару станциясына барып, құтқарушылардың күнделікті жұмысын, заманауи техникамен жабдықталуын, патрульдеу жүйесін және балалар қауіпсіздігіне бағытталған шараларды көрді.
Алакөл — тек демалыс аймағы емес, сонымен қатар үлкен жауапкершілік жүктейтін нысан. Біз мұндағы қауіпсіздікті қамтамасыз ету үшін тәулік бойы кезекшілік жүргіземіз. Қазіргі таңда станциямыз толық жарақталған, жаңа катерлер мен арнайы сүңгуір жабдықтармен қамтылған. Біз 5 маусымнан бастап Алакөл ауданы Ақши және Көктұма көл жағалауында қауіпсіздікті қамтамасыз етеміз. Қазіргі таңда полиция дапартаменті басқармасынан және Алакөл аудандық ішкі істер бөлімінен 30 адам жұмылдырылды. Күндізгі және түнгі бөлімде бес экипаждан астам қызмет атқарады. Жетісу облысының аумағы 124 шақырымнан бастап Көктұма ауылына дейін 84 қызметкер, 41автоэкипаж жол қауіпсіздігін қамтамасыз етеді. Бұл іс-шаралар қылмыстың алдын алу, құқықбұзушылыққа жол бермеу мақсатында жасалып жатыр, — деді Жетісу облысы полиция департаменті бастығының орынбасары, полиция полковнигі Жасұлан Байкенов.
Алакөл жағалауында шомылу маусымында 24/7 режимінде кезекшілік атқаратын қосымша патрульдер жұмылдырылған. Жағалау тек құрлықтан емес, сонымен қатар судан да дрондар арқылы бақыланады. Қауіпсіздік шараларын жетілдіруде азаматтық қорғау жүйесінде жаңа технологиялар кеңінен қолданылып жатыр.
Ауданда дрондық патрульдеу бар. Жағалаудың бар ұзындығы 12 километр. Дрондық патрульдеу жағалаудағы демалушы адамдардың үстінен бақылайды. Қандайда бір бұзушылық болып жатса, дереу учаскелік инспекторларға беріледі. Олар әкімшілік шара қолданатын болады. Биыл алғаш рет пилотсыз ұшу аппараттарын пайдалана бастадық. Бұлар су бетіндегі қозғалысты нақты бақылауға, төтенше жағдайға дер кезінде әрекет етуге мүмкіндік береді. Сонымен қатар жағажайда ескерту белгілері жаңартылып, дауыс зорайтқыш құрылғылар орнатылды, — деді Жасұлан Байкенов.
Іс-шара барысында көл жағалауындағы инфрақұрылымды дамыту, суды бақылаудың жаңа әдістері және ведомствоаралық әрекеттестікті күшейту тақырыптары кеңінен талқыланды.