Ақтөбе облысында шегіртке қаптап кетті. Зиянкестер, әсіресе оңтүстік аудандарында көп. Бірақ мамандар одан «еш қауіп жоқ» деп отыр.
Бұл туралы КТК телеканалы хабарлап отыр.
Шалқар ауданында ұсақ қара қоңызға ұқсас зиянкестер көбейіп кеткен. Құжынаған қанатты жәндіктің түрінен тұрғындар қорқып отыр. Мамандар оның шегіртке дернәсілі екенін айтады. Қанаты қатаймаған кезде осындай болады екен.
Қазір улағанмен, одан түк пайда жоқ, — дейді жауапты мекемедегілер.
Сондықтан қанаты қатайып, жұмыртқа салмай тұрғанда химиялық дәрі шашпақшы. Биыл Ақтөбе облысында 500 гектардан аса аумаққа дәрі шашу жоспарланған.
Бұл ешқандай қорқынышты зат емес. Бұл шегірткенің бірінші жасы. Әдістемеге сәйкес, шегірткені екінші, үшінші жаста улау керек. Неге десеңіз, бұл бірінші шығуы. Оны қазір улап тастаса, тағы шегірткелер шығады, — дейді агроөнеркәсіп кешеніндегі мемлекеттік инспекция комитетінің Ақтөбе облысының инспекция басшысы Асылхан Аптиев.