Алматыда тағы бір бала көлік астына түсіп, қаза болды. Бұл туралы Алматы ПД баспасөз қызметі хабарлап отыр.
Куәгерлердің айтуынша, қайғылы оқиға Байзақов көшесінде, Бөгенбай батыр мен Қарасай батыр көшелері арасында болған. Көлік жеті жастағы баланы қағып, ол оқиға орнында қаза болған.
Полиция мәліметінше, қайғылы жол-көлік оқиғасы сағат 15:30 шамасында болған. Бала жолды рұқсат етілмеген жерден кесіп өтпек болған.
Jetour автокөлігінің жүргізушісі Байзақов көшесімен солтүстік бағытта келе жатып, жеті жастағы баланы қағып кетті. Бала шығысқа қарай жолдың рұқсат етілмеген бөлігінен өтіп бара жатқан. Соққы салдарынан ол қарама-қарсы бағытта келе жатқан Hyundai маркалы көлікке соғылған. Өкінішке қарай, алған жарақаттарынан бала оқиға орнында қаза болды, – делінген хабарламада.
Ведомство мәліметінше, адам өліміне әкеп соққан жол-көлік оқиғасы бойынша Алматы ПД тергеу басқармасы қылмыстық кодекстің 345-бабы 3-бөлігі бойынша қылмыстық іс қозғаған.