Шығыс Қазақстан облысында қос азаматтықпен жүрген екі адам елден шығарылды. Бұл туралы ШҚО полиция департаменті хабарлап отыр.
Өңірдің полиция қызметкерлері екі елдің төлқұжатымен жүргендерді жауапқа тартып жатыр. Жыл басынан бері басқа мемлекеттің азаматтығын алғаны туралы ішкі істер органдарына хабарламаған 16 адам анықталып, олардың екеуі елден шығарылды.
Мәселен, тұрғындардың бірі 2021 жылы көрші елдің азаматтығын алғанымен, бұл туралы Қазақстанның көші-қон қызметіне белгіленген мерзімде хабарламаған. Оның айтуынша, құжаттарды тапсыру қажеттігін білмеген және отбасылық жағдайлар Қазақстанға уақтылы оралуына мүмкіндік бермеген. Сот оны елден шығару туралы шешім шығарды, — делінген хабарламада.
Айта кетейік, 2025 жылғы наурыз айынан бастап Қазақстанда азаматтығынан айырылған тұлғалардың ҚР құжаттарын пайдалануына қатысты заңнамаға өзгерістер енгізіліп, жауапкершілік күшейтілді. Енді аталған құқықбұзушылық үшін айыппұл мөлшері 100 АЕК-тен 200-ге дейін артты.
Басқа елдің азаматтығын алған адамдар 30 күн ішінде көші-қон қызметіне хабарлап, бұрынғы азаматтығын растайтын құжаттарды тапсыруға міндетті екенін ескертеміз. Бұл талапты бұзғаны үшін әкімшілік жауапкершілік қарастырылған, — делінген ақпаратта.