Биыл Қазақстан азаматтарына 346 миллиард теңгеге зейнетақы төленді. Бұл туралы еңбек және халықты әлеуметтік қорғау министрлігі хабарлап отыр.
2025 жылғы 1 ақпандағы жағдай бойынша зейнеткерлер саны – 2 миллион 445 мың адам. Оның ішінде базалық зейнетақы төлеуге – 111,8 миллиард теңге, ынтымақты зейнетақы төлеуге – 234,2 миллиард теңге қарастырылды.
2025 жылғы 1 ақпандағы жағдай бойынша жиынтық зейнетақының орташа мөлшері 143 248 теңге болды, оның ішінде ынтымақты зейнетақы мөлшері – 95 789 теңге, базалық зейнетақы – 47 459 теңге.
Айта кетейік, 2025 жылғы 1 қаңтарда базалық зейнетақы төлемінің мөлшері ҚР ұлттық банкі айқындайтын инфляцияның болжамды деңгейіне сәйкес 6,5%-ке, ынтымақты зейнетақы 8,5%-ке, яғни инфляция деңгейінен 2%-ке оза отырып ұлғайтылды.
Бұдан басқа мемлекет басшысының тапсырмасы бойынша 2023 жылдан бастап бес жыл ішінде ең төмен базалық зейнетақыны ең төмен күнкөріс деңгейінің 70%-не дейін, ең жоғары – 120%-ке дейін жыл сайын кезең-кезеңімен арттыру жүзеге асырылады.