Президентке Қарағанды облысының 2023 жылғы әлеуметтік-экономикалық даму қорытындысы туралы есеп берілді. Бұл туралы Ақорда хабарлады.
Облыс әкімі Ермағанбет Бөлекпаевтың айтуынша, былтыр 11 айдың ішінде өңірдегі өнеркәсіп өнімінің көлемі 3,1 триллион теңге болған. Негізгі капиталға салынған инвестиция 16,3%-ке артып, 727 миллиард теңгеге жеткен. Өңдеу өнеркәсібі салаларында: машина жасау ісінде 45%, жеңіл өнеркәсіпте 23,9%, фармацевтикада 20% өсімге қол жеткізілген.
Қағаз өнеркәсібінде, құрылыс индустриясы мен қара металлургияда өсім байқалады. Шағын және орта бизнес саласында 100 мыңнан астам компания қызмет етеді және бұл бағытта өңірдегі белсенді халықтың 45%-і жұмыс істейді. Кәсіпкерлер үшін бөлшек салықтың мөлшері 4%-тен 2%-ке дейін төмендеген. Биыл жалпы өңірлік өнімдегі шағын және орта бизнестің үлесін 19%-тен 25%-ке арттыру жоспарланған; экономиканың барлық саласында 25 мыңнан астам жұмыс орны ашылып, жұмыссыздық деңгейі 4,1%-ке, кедейлік деңгейі 2,7%-ке дейін төмендеген; халықтың нақты табысы 4,7%-ке көбейген. Ауылдарда 92 денсаулық сақтау нысанының құрылысы, екі ауданаралық аурухананы жаңғырту жұмыстары басталған. Биыл «Жайлы мектеп» жобасы аясында өңірде 7 100 орындық 10 мектеп пайдалануға берілмек.
Бұдан бөлек, президентке жылыту маусымының барысы, Qarmet кәсіпорнындағы қазіргі жағдай туралы баяндалды.
Мемлекет басшысына жаңа инвестордың өндірісті тұрақтандыру және оның көлемін арттыру бағытында қабылдап жатқан шаралары, сонымен қатар өндірісті жаңғырту және компания жұмысшыларының еңбек қауіпсіздігін қамтамасыз ету жоспары жөнінде мәлімет берілді.
Сонымен бірге Е.Бөлекпаев әлеуметтік саланың жай-күйі, «Ауыл – ел бесігі» және «Ауыл аманаты» жобаларының іске асырылуы туралы да баяндады.
Қасым-Жомарт Тоқаев облысты одан әрі дамыту және тұрғындардың әл-ауқатын жақсарту жөнінде бірқатар тапсырма берді. Сонымен бірге Qarmet компаниясына қарасты нысандардағы жағдайды ерекше бақылауға алу қажет екенін атап өтті.