Қасым-Жомарт Тоқаев «Лукойл» мұнай компаниясының президенті Вагит Алекперовпен кездесті.
Ақорданың баспасөз қызметінің хабарлауынша, Вагит Алекперов Қазақстан Президентіне мұнай компаниясының 2019 жылы Қазақстанда атқарған жұмысы мен «Жеңіс», «I-P-2» теңіз жобаларын жүзеге асырудың қазіргі ахуалы мен перспективалары туралы баяндады.
Ресей бизнесмені Қазақстан Президентіне Алматы облысында биыл қыркүйекте ашылған жағармай өнімдері зауыты жұмысының алғашқы нәтижесі жайында да мәлімет берді. Кәсіпорын 700-ге жуық өнім түрін шығарады және 1,5 айдың ішінде өзінің жобалық қуатына толық жетеді.
Бұл — сіздің компанияның Қазақстан экономикасына қосқан елеулі үлесі. Мұндай бағыттағы инвестицияларға жан-жақты қолдау көрсетеміз, — деді Қасым-Жомарт Тоқаев.
Қазақстан Президенті бүгін Австралия елшісі Грейм Миханмен, Кипр елшісі Андреас Зиноноспен, Конго елшісі Давид Мадукамен және Мьянма елшісі Ко Ко Шейнмен де кездесті. Елшілер Президентке сенім грамоталарын тапсырды.
Қасым-Жомарт Тоқаев шетел дипломаттарын Қазақстанда қызметке ресми кірісуімен құттықтап, мемлекеттер арасындағы достық қатынастарды одан әрі дамытуға дайын екенін айтты, елшілердің игілікті миссиясына табыс тілеп, Австралия, Кипр, Конго, Мьянма басшылары мен Үкіметтеріне сәлем жолдады.