Қасым-Жомарт Тоқаев Қорғаныс министрлігінде болып, мемлекеттік органдардың бірінші басшыларымен бірге стратегиялық командалық-штабтық оқу-жаттығуына қатысты. Бұл туралы Президенттің баспасөз қызметі хабарлады.
Оқу-жаттығу қазіргі сын-қатерлерге байланысты елдің қорғаныс жүйесі мен әскери қауіпсіздігін сақтау мақсатында ведомствоаралық іс-қимылдарды нығайтуға бағытталған. Шарада сыртқы қатерлерді болдырмау үшін әскери және әскери емес сипаттағы мемлекеттік шараларды жүзеге асыру мәселелері пысықталды.
Мемлекет басшысы әрі Қарулы Күштердің Жоғарғы Бас қолбасшысы Қасым-Жомарт Тоқаев әскери қауіпсіздік саласындағы нормативтік-құқықтық актілерді жетілдіруді және қорғаныс жүйесі алдындағы міндеттерді шешу үшін мемлекеттік органдарды дайындау шараларын жолға қоюды тапсырды.
Оқу-жаттығу соңында Президент әскери борышын атқару кезінде қаза тапқан сарбаздар мен офицерлердің рухына тағзым етті.