Қырғызстан журналистерінің мәліметінше, 9 тамыз күні таңертең оқиға орнында баррикада да, милиция тұрақтары да болмаған. Беш-Күнгей мен Қой-Таш ауылдары арасында ұялы байланыс қалпына келтірілген. Бірақ интернет әлі нашар.
Резиденция төңірегін Алмазбек Атамбаевтың туыстары тазалап жатыр. Ғимаратқа кіреберісте арнайы жасақтың күйген көлігі тұр, қақпа қисайған, маңында ағаш үстелдер жатыр. Баспасөз орталығы болған киізүй дін аман.
Айналада үйілген тас, тікенді сым, патрон гильзалары жатыр. Алмазбек Атамбаевтың үйі аумағында барлығы 20-30 адам жүр.
Біз Алмазбек Атамбаевтың туыстарымыз. Мұнда ретке келтіру үшін, үйді күзету үшін келдік, — дейді бір жігіт.
Оның айтуынша, Алмазбек Атамбаев ұсталғаннан кейін бейтаныс біреулер келіп, үйдің астан-кестенін шығарып, бағалы заттарды, алтын бұйымдарды алып кеткен. Әсіресе, бірінші, екінші қабаттардағы бөлмелердің сау-тамтығы қалмаған, терезелер сынған, жиһаздар шашылып жатыр, қабырғалардан қан дағы көрінеді. Үйдің бұл бөлігі алғашқы операция кезінде бүлінген.
Журналистер ғимараттың үшінші қабатынан «Жолға мина қойылған» деген жазуы бар қағазды көрген. Осы жерге құм салынған қаптар жиналыпты.
Үшінші қабаттың кіреберісі екі арнайы операциядан кейін де тап-таза болып тұр. Бұрыштағы жиһаз бен баррикада ғана болған оқиғадан хабар береді, бұл жерде Алмазбек Атамбаев тығылған. Басқа заттың бәрі бүтін, тоңазытқышта ондаған бөтелке шарап тұр. Келесі бөлмеден «Манас» эпосының коллекциясы көрінеді. Бұрынғы Президент үйінің әр бөлмесінен кітаптар мен элита спиртті ішімдігінің қорабын көруге болады.
Үшінші қабатқа адамдар көтеріле алмады. Сол себепті мұнда бәрі таза, шашылмаған. Резеңке оқтардың ізі жоқ. Екінші қабатта резеңке оқ қабырғаны, теледидарды тесіп өткен еді. Еденнен ұрыс патрондарының гильзасын таптық. Мұнда қазір бізден басқа ешкім жоқ: жақтастары да, күш құрылымдары өкілдері де жоқ. Енді бұл үйге не болатынын біз білмейміз, — дейді Алмазбек Атамбаевтың туыстары.
7 тамыз күні Мемлекеттік ұлттық қауіпсіздік комитетінің арнайы жасағы Алмазбек Атамбаевтың Қой-Таш ауылындағы резиденциясына екі рет басып кірмек болған еді. Екі операция да сәтсіз аяқталды. Атамбаевтың жақтастары арнайы жасаққа тойтарыс берді. Тәртіпсіздік кезінде 45-ке жуық (кей мәлімет бойынша 50-ге жуық) адам зардап шекті. Арнайы жасақтың бір өкілі қаза тапты.
8 тамыз күні Алмазбек Атамбаевты ұстау арнайы операциясын Ішкі істер министрлігінің арнайы жасағы жүргізді. Оқиға орнына 3 мыңға жуық милиция қызметкері мен арнайы техникалар келді. 2 сағатқа созылған текетірестен соң Алмазбек Атамбаев милицияға берілуге келісті. Ішкі істер министрлігі оған сотталған Азиз Батукаевты заңсыз босату, яғни сыбайлас жемқорлық дерегі туралы қылмыстық іс бойынша айып таққан. Бішкектің Первомай ауданының судьясы Алмазбек Атамбаевты 26 тамызға дейін қамауға алу туралы қаулы шығарды.